काठमाडौँ — प्रधानमन्त्री पुष्पकमल दाहालले सरकारले विश्वविद्यालयमा शैक्षिक क्यालेन्डर लागू गर्ने बताएका छन् । आइतबार धुलिखेलस्थित काठमाडौं विश्वविद्यालयको २८औं दीक्षान्त समारोहलाई सम्बोधन गर्दै कुलपतिसमेत रहेका उनले एकीकृत क्लालेन्डर लागू गर्ने गृहकार्य भइरहेको जनाए ।
विश्वविद्यालय अनुदान आयोगले क्यालेन्डर बनाउन प्रारम्भिक काम सुरु गरेको छ । उक्त क्यालेन्डर आगामी भदौदेखि लागू गर्ने तयारी छ ।
उच्च शिक्षासम्बन्धी राष्ट्रिय क्यालेन्डर तयार भएपछि उक्त क्यालेन्डरको सेरोफेरोमा विश्वविद्यालयहरूले आ–आफ्नो क्यालेन्डर बनाई कार्यान्वयनमा ल्याउनुपर्ने उनले बताए । क्यालेन्डर लागू नहुँदा त्रिभुवन विश्वविद्यालयलगायतमा नतिजाका लागि १८ महिना र परीक्षाका लागि १२ महिनासम्म कुर्नुपर्ने बाध्यता छ । आयोगले तोकिएको समयमा भर्ना, परीक्षा र नतिजा सार्वजनिक नगर्ने विश्वविद्यालयको अनुदान कटौती गर्ने गरी क्यालेन्डर लागू गर्ने तयारी भइरहेको छ ।
त्यस्तै प्रधानमन्त्री दाहालले संघदेखि प्रदेशसम्म नयाँ/नयाँ विश्वविद्यालय स्थापना भएकोप्रति असन्तुष्टि जनाएका छन् । एउटै विषय पढाउन र उपाधि प्रदान गर्न धेरै विश्वविद्यालयहरू आवश्यक नपर्ने उनको भनाइ थियो । विज्ञहरूको सुझावविपरीत संघ र प्रदेश तहमा एक दर्जनभन्दा बढी नयाँ विश्वविद्यालय स्थापनाको तयारीमा छन् । ‘केही वर्षयता नेपालमा विश्वविद्यालय स्थापनाको होडबाजी चलेको छ, विश्वविद्यालय खोल्नुअगावै साधनस्रोतको सुनिश्चित गर्नु आवश्यक छ,’ उनले भने । आवश्यक पूर्वतयारी नगरी विश्वविद्यालय र उच्च शैक्षिक संस्थाहरू स्थापना गर्दा उच्च शिक्षामा समस्या थपिँदै गएको प्रधानमन्त्रीले जनाए । ‘गुणस्तर र विश्वसनीयताको सवाल गम्भीर प्रश्नका रूपमा खडा भएको छ, गुणस्तरीय शिक्षाका लागि विश्वविद्यालयहरू चुस्त र गतिशील रहनु आवश्यक छ,’ उनले भने ।
हाल सञ्चालनमा रहेका सबै विश्वविद्यालय र उच्च शैक्षिक संस्थाहरूले पठनपाठन र अनुसन्धानको शैली परिवर्तन गर्न आवश्यक रहेको प्रधानमन्त्री दाहालले औंल्याए । स्नातकोत्तर तहका पाठ्यक्रममा अनुसन्धान र नवप्रवर्तनलाई प्राथमिकता दिनुपर्ने र स्नातक तहमा बढी अभ्यासमुखी र सिकाइमा जोड दिनुपर्ने उनको भनाइ थियो । विश्वविद्यालय तहको अध्ययन र अनुसन्धानलाई सवल बनाउन सरकारका अनुसन्धानसम्बन्धी कार्यहरू विश्वविद्यालयहरूबाट गराउने निर्णय गरिएको उनले जनाए । आइतबार १२ सयभन्दा बढी विद्यार्थीलाई काठमाडौं विश्वविद्यालय दीक्षित गरेको थियो ।
Discussion about this post